L'instrucziun en il 2. ciclus sa basa sin quai ch'è vegnì acquistà fin lura; las cumpetenzas dal rom e las cumpetenzas transversalas vegnan approfundadas ed extendidas. Las tecnicas culturalas leger, scriver e far quints vegnan exercitadas, extendidas e consolidadas vinavant. Cun agid da temas autentics exploreschan, retschertgan e perscruteschan las scolaras ed ils scolars l'ambient e s'acquistan invistas pli profundas. Areguard ils puncts centrals s'orientescha l'instrucziun als roms, ma l'instrucziun interdisciplinara e projects correspundents han lieu era vinavant.
Las cumpetenzas per l'emprender sistematic vegnan sviluppadas ed extendidas cuntinuadamain, ed il svilup dal pensar concret al pensar abstract vegn promovì. A las scolaras ed als scolars vegni mussà da reflectar davart lur emprender e lavurar e da diriger l'emprender e lavurar a moda pli e pli independenta e cun dapli atgna responsabladad. L'occupaziun cun sasezs e cun auters umans sco era l'emprender en gruppas furman elements impurtants da l'instrucziun.
En questa fasa da l'emprender e da la vita extendan las scolaras ed ils scolars lur radius d'acziun. Els etableschan contacts socials ordaifer lur famiglia ed ordaifer lur conturns.
A la fin dal 2. ciclus ha lieu la midada al 3. ciclus. Quai suenter la procedura d'admissiun, nua che la prestaziun da las scolaras e dals scolars en scola vegn stimada e giuditgada.
L'emprender elementar dal 1. e 2. ciclus vegn cuntinuà en il 3. ciclus. Enconuschientschas, abilitads ed inschigns vegnan approfundads ed extendids en l'instrucziun specifica dal rom. Il pensar ed emprender abstrahant daventa pli impurtant pervia dal svilup general e cognitiv da las scolaras e dals scolars, senza ch'i vegnia smess cun l'emprender a maun d'acziuns e situaziuns concretas. Cumpetenzas transversalas vegnan exercitadas cuntinuadamain ed a moda pli profunda. Tenutas e posiziuns vegnan reflectadas, uschia che las scolaras ed ils scolars daventan pli e pli abels d'emprender a moda independenta ed en atgna responsabladad.
Il 3. ciclus cumpiglia il stgalim secundar I che sa divida en la scola reala e secundara2. El dura trais onns. Il purtader da scola dal stgalim secundar I po manar la scola reala e secundara tenor differents models cooperativs. Directivas departamentalas reglan l'organisaziun e la permeabilitad. Las pussaivladads curricularas d'elecziun e da concepziun da las scolaras e dals scolars s'augmentan.
Scuvrir ed enconuscher ils agens talents ed interess e las atgnas preferenzas furma in punct central en vista a l'ulteriura via da furmaziun. Las scolaras ed ils scolars vegnan preparads per la midada al stgalim secundar II sco era accumpagnads e sustegnids en la tscherna da lur professiun ed en la planisaziun da lur carriera.
En questa fasa da la vita datti midadas impurtantas tar las scolaras ed ils scolars, tant en reguard corporal sco era emoziunal e social. L'occupaziun cun sasezs è in tema central e l'appartegnientscha ad ina gruppa daventa ina chaussa impurtanta. Ils giuvenils s'orienteschan pli fitg als peers, sa distatgan plaun a plaun da la chasa dals geniturs e tschertgan dapli independenza.
2Infurmaziuns davart il diever da las differentas structuras da scola sin il stgalim secundar I èn da chattar en la Survista dal Plan d'instrucziun 21.
